TURA: Election-ni somoirango National People’s Party (NPP)-ni dilgiparang bang·en ku·rachakanirangko on·ahaoba da·onan Mangsang jolrango maming namroro silroroanirangko nikna man·kujaenga ine Garo Students Union (GSU) Mangsang unit parakatenba, dingtang dingtang nanganirangko a·dokni Chief Minister aro NPP-ni national president Conrad K Sangma-na seachi u·iataha.
GSU Mangsang unit-ni parakatani gitade, Mogru aro samba jolo donggipa songrango songdongenggipa Garo aro Khasirangni gisepo a·ana golmal ong·anirang donga aro ia golmalrangko ta·raken namatna gita nangenga.
Rongjeng-Mangsang-Adokgre ramani gimin janapatskaengon, ia ramara Mangsang jolrango songdongenggipa manderangna mongsonggipa re·a doani chol ong·achim aro ia ramako ta·raken matchotate on·china GSU changni chang sorkarina gisik ra·ataniko on·ahaoba da·alonan ia ramako matchotkujaenga ine GSU Mangsang unit parakatenba, ia ramako ta·raken matchotate on·china Chief Minister-ko mol·molataha.
Rongjeng-ko Civil Sub-Division songahaode Mangsang-ko Community & Rural Development (C&RD) Block songskagen ine NPP-ni ku·rachakaniko gisik ra·atpilangengon, ia ku·rachakaniko da·alonaba chu·sokatchipkujaenga ine Mangsang-ko ta·raken C&RD Block songchina GSU Mangsang unit didiataha.
Mangsang jolrango wa·al kamani ba uandake rang·gitik a·sel ong·ani somoirango manderangna dakchakanirangko on·na man·na gita ta·raken Fire service station-ko kulie on·china gitaba GSU Mangsang unit, a·dokni Chief Minister-ko mol·molataha.
