AMPATI: Batanggimin somoirango Bangladesh a·songoni niam gri re·napbagipa manderangko Garo Hills-o bang·en rim·na man·engahaon, Bristibar saloba South West Garo Hills a·jani police-rang, Bangladesh a·songoni niam gri re·napbagipa sakbonga manderangko Zikzak jolo rim·na man·taiaha.
South West Garo Hills a·jani SP Vikash Kumar-ni u·iatani gitade, Bristibar pringni 11:42 bajimango police-rang, Zikzak-o donggipa KGBV skul sambao, re·ruraenggipa garirangko nirok sandiengmiting somoio Assam-ni saksa Md Nur Hussain minggipa mande saksani salenggipa AS-34C 0613 Bolero Pik-up gariko, Gopinathkilla-chipakni Assam Hatsingimari-chipakna re·angmitingko rim·soaha aro ia garioniko am·sandion Bangladesh a·songni ine chanchichipgipa mande sakbongako man·aha.
Iani bidingo chubatgipa official-rangna u·iatani ja·man, ia mande sakbongako aro police-rangni rim·gipa gariko Zikzak police station-ona rim·ange, ia manderangoniko am·sandion, India-ni Aadhar king 5, India-ni Airtel SIM Card ge·sa baksa mobile phone ge 2, aro Bangladesh a·songo tarigipa nasal drop baksana Lorix cream-ko man·aha.
Ia manderangoniko man·gipa Aadhar card-rangko mAadhar App-ni name am·sandion, ia card-rangara choligiparang ong·ja ine ma·sina man·aha aro ja·mano ia manderangko name sing·sandion, ia manderangara Bangladesh a·songni manderangan ine police-rang ma·sina man·aha.
Ia manderangko sing·sandiangkuon, uamang kam ka·e cha·na gita Kolkata-ona re·angnasa, Gopinathkilla-chipakni Hatsingimari-chipakna re·angengachim ine ma·sina man·aha.
Rim·a man·gipa manderangara, Bangladesh a·songni Rajshahi a·jao donggipa Char Sikhalipur songni bilsi 21 ong·gipa Md Jahangir Ali, bilsi 30 ong·gipa Md Jaidul Islam, bilsi 37 ong·gipa Md Durul Ali, bilsi 19 ong·gipa Md Maruf Ali aro bilsi 22 ong·gipa Md Babu Sheikh ong·achim.
SP-ni parakatani gitade, ia manderango sing·sandion, uamang South Garo Hills a·jani Baghmara jolo donggipa sima gita niam gri re·napbaaha ine ma·sina man·aha.
