TURA: North Garo Hills a·jao National Highway (NH-51) ramaoni Raja A·pal song gita Damebibra-ona dakanggipa ramao donggipa Medu A·pal songni dolong namsrangjahani a·sel gari gorarang re·na man·jae songni manderang neng·nikanirangko chagrongna nangtokenga ine u·iatenba, ia dolongko ta·raken taripile on·china songni manderang didiataha.
Raja A·pal songni saksa dilgipa Nicholas Sangma-ni parakatani gitade, ia dolongara Medu A·pal, Raja A·pal aro uandakgipa songni manderangna dilsa nangchongmotgipa rama ong·achim indiba ia dolongko ru·uta bilsirangnan nirok sandianirang dongjani a·sel da·o ia dolong gita gari gorarang re·rurana man·jae, songni nokni manderang namen neng·nikanirangko chagrongna nangtokengachim.
“Da·o Krismasni somoi ong·engahani gimin songni nokni manderang, an·tangtangni nanga kamrangna aro bazar korosrangna ia ramakon re·rurana nangtokengachim indiba Medu A·pal songo donggipa bolni dolong da·o namsrangjahani a·sel gari gorarang re·rurana man·jae neng·nikanirangko chagrongna nangtokenga,” ine Sangma parakatenba, ia dolongko ta·raken tarie on·china North Garo Hills a·jani nangchakegipa department aro official-rangko mol·molataha.
