SHILLONG: Re·baenggipa February-ni 21 tariko ong·atenggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o susana gita Meghalaya a·dokni Bharatiya Janata Party (BJP), ma·mongo dilgiparangni ra·chakanina sengkuenga.
Iani bidingo kobor ra·timgiparangna u·iatengon, KHADC aro JHADC election-o susana gita uamang, candidate-rangni bimingko ma·mongona watatmanaha aro da·o dilgiparangni ra·chakaniko uamang sengkuenga ine BJP-ni ku·wattimgipa M Kharkrang parakataha.
KHADC aro JHADC election-o susana sienggipa candidate-rangko gipin political dolrangde paraktokengahachim ine nikna man·a.
Kharkrang-ni parakatani gitade, KHADC aro JHADC election-o BJP-ni tikitchi susana nangnikenggipa sak 17 manderangni bimingko uamang, ma·mongni dilgiparangna watatmanaha aro da·o ia candidate-rangko ma·mongni ra·chakanikosa uamang sengenga.
“Budbar salo ma·mongni BJP dilgiparang tom·enba, candidate-rangko seokanggnok,” ine Kharkrang aganaha.
Mitam constituency-rangode party-ni tikitna dorgasto galgiparang bang·ahani gimin uamang nambatgipa candidate-kosa seokna nangaha ineba Kharkrang aganaha.
Re·anggipa bilsio ong·atanggipa Lok Sabha election-o BJP, National People’s Party (NPP)-na chakpaanirangko on·ahaoba ia district council election-ode uamang susana sienga ineba BJP-ni ku·wattimgipa parakataha.
“Chinga national party ong·e high command-ni ra·chakaniko sengna nangaia,” ine ua aganaha.
Ia district council election-o Trinamool Congress (TMC)-na agrede gipin political dolrang, jekai NPP, UDP, Congress, VPP, HSPDP aro gipinrangba an·tangtangni candidate-rangko paraktokahachim ine nikna man·a.