SHILLONG: Rel project-ni bidingo pilak dolrangni committee songna nanganiko Voice of the People’s Party (VPP) sing·doangenba, ia committee-o bak ong·pana nangnikgijaniko parakattaiaha.
“Rel project-ni bidingo maini gimin pilak party-rangni committee-ko songna nangenga? Manderangni nangnikanirangko sorkari namen ma·sienga aro chingaba iani bidingo Assembly-on talate on·manaha,” ine VPP-ni president Ardent Miller Basaiawmoit parakataha.
Rel project-ko chu·sokgipa ong·atna sorkarini krenge kam ka·anio political dolrang bakrimaniko on·jagenchimode a·doko skango gitan apsan obosta ong·angkuaigen ine sorkarini aganahani gimin VPP-ni president, ia kattarangko aganskaaha.
Meghalaya a·doko, mongsongbate Khasi aro Jaintia Hills a·jarangona rel ramarangko taribana gita a·dok sorkarini pilak party-rangni committee-ko songanio VPP aro a·dokni Congress dolde bak ong·pana tik ka·manahachim.
“A·doko rel ramarangko tarina skang, niam gri napsrukanirangko champengna gita niamko ra·gate on·chenganikosa chinga nangnikenga,” ine Basaiawmoit aganaha.
Pilak party-rangni committee-ko songdrana gita sorkarini krengengani gimin sing·doatengon, “Sorkari rel garirangko nangnikenga ong·ode an·tangtang kamrangko ka·aichina indiba maini gimin committee-ko songna nanga? Chingade a·bachengonin an·tangtangni nangnikaniko u·iatmanaha,” ine VPP president aganaha.
India aro Bangladesh a·songni simarango chel·chakanirangko bilakbatatchina gitaba VPP-ni president dabiangaha.
“A·song damgnini simarangko kapengoba kapengjaoba sipai dolrangni chel·chakaniko bilakbatatna nangchongmotenga aro iasa mongsonggipa kam ong·a,” ine Basaiawmoit, India aro Pakistan a·songni gisepo so·sojengjeng ong·enganina simarangko fencing kaani gimin sorkarini agangipa kattarangna aganchakaniko on·angaha.
“Sima kaaniko manderang jegaljaenga ong·ode, manderang an·tangtangni a·arangko, mongsongbate game ge·e cha·enggipa a·arangko gimaatjana gita sorkari ja·kuko de·na nanga. Sima ari jolrango songdongenggipa manderangni gimin sorkari chanchina nanga,” ine ua aganaha.