Da·al salni bako DCA Minister baksa tom·e chanchirimgen
SHILLONG: Garo Hills Autonomous District Council (GHADC)-ko chalaianio dingtang dingtang neng·nikanirangko chagrongna nangengani gimin gipin a·dokrango gitan Meghalaya a·dokoba, mongsongbate GHADC-naba nambata cholrangko on·china GHADC-ni Deputy Chief Executive Membor Nikman Ch Marak didiangaha.
GHADC-ko chalaianio chagrongna nangenggipa neng·nikanirangko janapatengon, GHADC-o kam ka·giparangko nangana bate rakkiani a·sel, chu·onga gita tangka paisarangko man·jaengani a·sel aro jilla jolrango GHADC-ni bilrangko municipality-ni ning·o man·engani a·selba council-ko chalaianio neng·nikanirangko chagrongna nangenga ine Marak parakataha.
“GHADC-o nangana bate kam ka·giparangko rakkiani a·selan dormaharangko on·anioba neng·nikanirangko chagrongna nangenga. Gipin autonomous district council (ADC)-rang, jekai Bodo Autonomous Council aro Tripura Tribal Areas Autonomous District Council-rangode 7th Pay Commission-ko ra·gatan baksana a·dok sorkarirangba State Finance Commission-rangko songe on·ani gimin a·dokoniko bang·en man·gnirang donga,” ine Marak aganaha.
Shillong songjinmani mitam bakrangna agrede Meghalaya a·dokni pilak biaprangan Sixth Schedule ning·o ga·ake, district council-rangna niam bidiko bilko on·a ine janapatengon, district council-rang ma·mong sorkarina kajinako gamengani gimin ia kajinarangko ma·mongba a·dokna sualatskaenga aro ia kajinarangni bakko district council-na sualskaanide State Finance Commission-ni daitosa ong·achim ine Marak parakatenba, iandakgipa kamrangko nirok a·doko State Finance Commission-ko songchina GHADC-ni Deputy CEM didiangaha.
“ANVC aro ANVC-B dolrangni, a·dok aro ma·mong sorkarirang baksa songgigrikanion State Finance Commission-ko songna aro GHADC gita dakgipa district council-rangna apsan ong·e tangka paisarangko sualna niamko donahachim. Ia kamrangko chu·sokate on·genchimode ADC-rangba gipinrangoni ja·manchakjawachim,” ine ua aganaha.
Marak-ni parakatani gitade, Garo Hills-ni bang·bata jillarangon district council-ni bilrangko municipality ra·sekahani a·selan dingtang dingtang namroro silroroani scheme-rangko chu·sokatanio neng·nikanirangko chagrongna nangenga.
Da·al Mongolbar salni bako, uamang a·dokni District Council Affairs Minister baksa tom·aniko ong·atenga aro ia tom·anio uamang, dingtang dingtang neng·nikanirangko chanchirime namatna ka·dongenga ineba Marak parakataha.