SHILLONG: Shillong Medical College & Hospital-ko ia bilsini gisepon a·bachengna siengahaon, kamrangko nirokna gita a·dok sorkari, Shillong Medical College Council-ko songe on·angaha.
Sorkari official-rangni u·iatani gitade, ia Council-ni College-ni Dean dilgen aro iano gipin sak 14 membor-rangba donggen.
Ia Council-an, National Medical Council (NMC)-ni dongimin niamrango pangchake, Shillong Medical College-na policy-rang, curriculum aro college-o skie on·ani baksana skie ra·ani niamrangkoba tarie on·gen.
Una agreba, sorkari institute-rango medical aro nursing course-rangko dakenggipa chatro chatrirangoniko fee-rangko ra·na gita Health & Family Welfare department-ni ning·o sorkari, ‘Fees Committee’-koba songe on·angaha ine u·iataha.
Commissioner & Secretary Joram Beda-ni u·iatani gitade, ia committee-ko Health Department-ni Commissioner & Secretary, chairperson ong·e dilanggen aro unbaksana Health Services (Medical Education & Research)-ni Director, Member Secretary ong·e, Meghalaya Medical Council, Directorate of Higher & Technical Education, Law Department, Finance Department-ni official-rang membor ong·e kamko ka·skagen.
Indake ong·engon, Shillong Medical College-na dingtangmancha Anti-Ragging Committee-koba songe donangaha aro ia committee-ko College-ni Dean chairman ong·e dilanggen. Ia committee-an, medical college-ni campus aro hostel-rango ragging ka·aniko champengna dingtangmancha niamrangko tarigen aro mikrakatanirangkoba on·anggen.