AMPATI: South West Garo Hills a·jao man·gipa metric ton (MT) 10 gul murisrangko Bristibar salo, Zikzak Block-ni ning·o donggipa Kerupara aro Dingampara Integrated Village Cooperative Society (IVCS)-rang, Chapahati Prime Hub-oniko Mumbai songjinmaona watataha aro ian South West Garo Hills a·jani gul murisrangko gnigipa changna Mumbai songjinmaona watataniba ong·aha.
2023 bilsioba Zikzak block-ni ning·o donggipa Dimiligre IVCS, game ge·e cha·giparang aro MBMA-ni krenge kamko ka·anichi, ton 11 gul murisrangko Mumbai songjinmaona watatna man·ahachim.
Indake ong·engon, M-LAMP aro Meghalaya Basin Development Authority (MBMA)-ni dakchakanichi Kerupara aro Dingampara IVCS-rang, South West Garo Hills a·jao game ge·e cha·enggipa manderangoniko MT 10 ong·gipa gul murisrangko chimonge, Mumbai songjinmao donggipa Sundardas Rataney Spice Pvt Ltd-ona watataha.
Kerupara aro Dingampara IVCS-rangni watatgipa ton 10 gul murisrangoni kg 6600 gul murisrangko kg-prako gong 640 ka·e Kerupara IVCS chimongna man·aha aro kg 3400 gul murisrangko, kg-prako gong 610 ka·e Dingampara IVCS chimongna man·skaaha. Gul murisrangko tosusaanio Dingampara IVCS-ni man·gipa gul murisrang on·tisa namkalbatjani a·sel damrang adita komibataha ine official-rang parakataha.
South West Garo Hills a·jani Deputy Commissioner Hema Nayak, South West Garo Hills a·jani Am·beng Farmers & Producers Association aro MBMA-ni farmers & marketing executive Bravantyo Marak-ni rakbee kamrangko ka·anichi, ia gul murisrangko Mumbai songjinmaona watatna man·aha ineba official-rang parakataha.
Ia gul murisrangko India a·songo mosila tarianio mingsinggipa Everest Masala & Everest Food Products breskagen ine Mumbai songjinmao donggipa Sundardas Ratansey Spice Pvt Ltd-ni Director sakgni, chong·motan Satish Dharamsey Pallicha aro Kalind Satish Pallicha parakataha ine MBMA-ni DPM Grikseng Ch Marak u·iataha.