Tura: Jatni dakbewalo Garo Hills-ni Comilla Cotton-ko ripinge rakkina miksonge adita salrangna skang, West Garo Hills a·jani District Agriculture Office-ni gita “Modern Cultivation Practices & Future of Comilla Cotton,”-ni bidingo salsana workshop-ko Tura-o ong·atangaha. Ia ong·atanggipa workshop, State Government’s Comilla Cotton Scheme-ni ning·o ong·atanggipa ong·a jean iandakgipa ma·ambioni man·rikbaenggipa gama ge·anirangko namdapatna, aro adoko man·gipa rokkom-ni biterangko badingchiwalani bidingrango agan-talate on·anganiko dakangaha. Ia workshop-o, West Garo Hills a·jani dingtang dingtang a·dokrangoni gimik sak 60-na batgipa kil-rangko gama ge·aniko dakenggiparangan iano bakko ra·angaha. District Agriculture Officer, Paulette A. Sangma, ia ong·atanggipa workshop-o mongsonggipa sokgipa ong·e jinmana aganprakangengon, gama ge·aniko dakenganiko namdapatna gita iandakgipa scheme-rangni gita dakchakani cholko rachina didianganiko onangenba, ian adoko skanggipa changna kilrangko gama ge·aniko dakenggiparangna sorkarini gita dakchakaniko on·enganiba ong·a ine talatangaha.Una agreba, Comilla Cotton-ko chalaipilanio, jatni dakbewalko ripingani chol ongan baksana songadam nokadamo dongenggipa manderangni janggi tangani gadangko namdapatani cholba ong·a ineba ua aganangaha. Indake Dadenggre Sub-Divisional Agriculture Officer A. B. Marak, ia ong·atanggipa program-o, gama ge·anirangko dakenganio badingchiwalani a·bao namgnirangni gimin agantalatanganiko dakangengon, jatni ganding chinding-oni dingtang dingtang gipin gandingrangkoba iandakgipa ong·telaigipaoniko tariana man·ani cholrangko ra·e gama ge·anirangko dakenganio gisiko nanggiparang aro namdapatanina dingtanganiko ra·bagiparang ong·china sakanti game ge·e cha·enggiparangko didiangaha.
Una agreba, workshop-o bak ra·anggiparangna gama ge·aniko nosto ong·atgipa rokkom-ni jo·ongrangko aro sabisi-rangko champengani cholrangko agan-mesoke on·anganiko dakangan baksana, gama ge·aniko nadapatna gita gitalgipa technology-rangko jakkalani aro badingchiwalaniko namdapatani cholrangkoba agan-talate on·angaha.Songadam nokadamrango gama ge·ani aro badingchiwalanirangko namdapatna miksonge ia a·bachengataniko, a·dokni dingtang dingtang block-rango game ge·e cha·enggiparangna, training program, bitchilrangko sualani aro gama geanirangko namdapatani bidingo agan-skie onnanirangko dakangaha. Ian mikkangchi Comilla Cotton-ko gipin a·songrango badingchiwalanirangko dakna miksonganio Meghalaya a·doko gama ge·anirangko namdapatna ja·ku de·enganiko a·bachengatani ong·a.
