SHILLONG: HITO, Meghalaya a·doko ta·raken Inner Line Permit (ILP) niamko donchina ma·mongni Home Minister Amit Shah-ko mol·molataha.
Batanggimin adita salrang skang India aro Pakistan-ni gisepo nanggrikanganio aro dingtang dingtang obosta ong·anirangchi, India-ni gimik border ba sima ari jolrango mongsongbate golmal ong·na altubatgipa sima arirango chelchakaniko bilakdapatna nangnikaniko mesokaha. India-Bangladesh sima ari gita, bang·en manderang niamgri napsrukanirang batrikrikengon, ian Meghalaya a·dokna jajrengani ong·a.
HITO-ni parakani gita, da·ororo bang·en a·doina niamgri napsrukbagiparang nokli Aadhaar aro EPIC card-rangko tarie jakkalsretani koborrangko man·engon, iarangko champengna ta·raken ILP-ko nangenga ine aganaha. Niamgri napsrukgiparang, jolni manderangni namgnina on·gipa welfare scheme-rangko man·pana gita nokli document ba lekkarangko tarie jakkalenga.
Mejaomangmang Sohra-o ong·anggipa obostakoba HITO janapaha. Jeon Madhya Pradesh-oni jikse roramna re·baon, jikgipa uni mikchagipa aro gipinrang baksa melie segipako so·otaha. Ia ong·gipa obostarangara jolni manderangna bilongen kenchakani ong·a, uni gimin bilakgipa regulotary mechanism ba niamrangko donna nangenga. ILP-ko ra·gata ong·ode sima ario chelchakaniko bilakdapatgen, jolni manderangko chelchakgen aro niamgri napsrukanirangko champenggen ine HITO aganaha.
