SHILLONG: North Garo Hills-ni sakgni MLA-rangni kosako niamgri kamo rakkianina aro an·tangni namnikgipa manderangko rakkianina matnangatanio uamangni kosako CBI mamlarangko segatangjaha.
Sorkarioni maming ra·chakani dongjani gimin MLA-rangni kosako CBI mamlako seatangna man·jaha, ine koborrangko parakataha.
2022 bilsio Meghalaya sorkari a·doko mamlako am·sandina CBI-na on·ako ra·galpilaha.
Am·sandianiko dakna on·ako ra·galpilani miksonganide agency a·dok sorkarini maming ge·etani gride a·doko jedakgipa mamlarangko am·sandina man·jawa.
North Garo Hills-oni sakgni MLA ong·enggiparang, Meghalaya Legislative Assembly-ni Deputy Speaker Timothy D Shira aro Mendipathar-ni MLA Marthon J Sangma, uamangko niamgri an·tangni namnikgipa manderangko kamo rakkianina matnange uamangni kosako Shillong-o CBI-ni Anti-Corruption Branch baksa skangon matnangaha.
Songdonggipa CBI-na chitti segipa on·aha aro ia apsan chittiko The Shillong Times-onaba watataha, jeon Marthon J Sangma an·tangni depantegipa Algore D Shira-ko North Garil Hills-ni District Selection Committee-ni membor dake songaha jeon maming official u·iata gri, kakket ong·ani ba ronggrike kam ka·ani gri songaha ine matnangataha.
Apsan dake, Timothy D Shira, an·tangni depante Pongsik G Monin-ko DSC-ni vice chairman dake songaha, ine chittio matnange seangaha.
