TURA: GHADC-o GST consultancy-o sing·sandianiko dakna Special Inquiry Committee (SIC) membor-rangko songtaianiko nangnike Tura GDC constituency-ni MDC Bernard N.Marak dabiangaha.
Marak, jean ku·sikmmangmangchi talatenganina Sukrobar salo Committee-ni gita okamatako man·gipa, Secretary-na, EC-na, GHADC-na aroba SIC membor-rangna lekka seaha, jeon ua am·sandigipa baksa bakrimchina a·bachenge mol·molangako ua talatangaha jeon uni bebe ra·ani gitade Sumit Kumar Jain Bohra-ni bidingo kakketko donmitapna jotton ka·enga, Bohra an·tangko saksa professional ong·e a·kangenga, kakketko aganode ua class X-na poraidapanga dongja, ine Marak aganaha.
“Ia mande baksa MoU soi ka·anggipani bidingo chanchina nanggipa ong·chongmotenga aro manderangni ka·dongchakna man·aniko donpilna bilakgipa am·sandianiko dakna kraa,” ine ua aganaha. Indiba ua SIC-ni sakgni membor-rangko jaksi otangaha, Grahambell A Sangma (Convenor) aro Ashahel D Shira (Documentation Officer), uamang a·solgipa MoU-o soi ka·anggiparang ong·a aro Sumit Kumar Jain Bohra-ko bakrimataha aro uni kusi ong·gijaniko aganangaha, Committee-o uamangni chanchapata am·sandianiko an·tangtang biming ra·na aro jedakgipa chanchianiko dona namnikaha.
MoU-na apsan nangchapgipa GST bangki dongkuenggiparangna (Grahambell aro Ashahel) sakgni membor-rang jak dongpaa, uni giminsa man·gnigiparangko bariatna chanchienga, ine ua agandapangaha.
Membor Secretary, Committee-o dongjani gimin Marak agandapangaha, indakgipa dakgualanirang name kamrangko ka·angna man·jana kenchakanirang donga aro am·sandianiko ja·gitdotatnaba man·gen aro kam ka·anganiko mikchepgen.
MoU baksa skango bak dongpagijagipa membor-rangko rakkianganichi Committee-ko songtaichina EC Secretary-ko MDC mol·molangaha.
“Indakgipa ja·kurangko de·anganio sakgipin mande jachapgija aro ronggrike kam ka·anio am·sandianiko dakna nanga aro ja·ku de·dapangna sal somoirangko ra·dapangna nangnaba donga,” ine ua agandapangaha.
