SHILLONG: Meghalaya a·doko me·chik aro bi·sarangni kosako ong·gija dakanirang batroroengani gimin Pornographic ba internet-o me·a aro me·chikrangni ong·gija dake roanirangko mesokgipa website-rangko champengatchina gita Meghalaya Pradesh Mahila Congress (MPMC), a·dokni Chief Minister Conrad K Sangma-ko didiataha.
Iani bidingo Chief Minister-na mol·mole sedoatengon, a·dokni dingtang dingtang biaprango me·chikrangko, mongsongbate bi·sarangko drae til·ekanirang batroroenga ine MPMC-ni president Joplyn Scott Shylla, an·tangni suk ong·gijaniko parakataha.
Ia sal somoirango me·a aro me·chikrangni ong·gija dake roani video-rangko altuaen internet-rangoniko nisona man·engani a·selan me·chik aro bi·sarangni kosako ong·gija dakanirang batroroenga ine janapatengon, “Iandakgipa a·selrangara an·chingni songsalna dongtogijaniko ra·baa aro internet-o iandakgipa video-rangko champengatna man·genchimode, me·chikrangni kosako ong·gija dakaniko bewalan komiatna man·naba gnangchim,” ine MPMC-ni president parakataha.
Iandakgipa a·selrangko bon·atna gita Meghalaya a·dokni ning·o pornography website-rangko champengatchina, cyber surveillance ba cyber-chi nirikkianiko bilakbatatchina aro internet-o on·enggipa video ba noksarangna rakgipa niamrangko donchina a·dokni Chief Minister-ko MPMC mol·molataha.
Internet-rangko jakkalani bidingo skul aro dingtang dingtang gittimrango awareness program-rangko ong·atchina gitaba MPMC, a·dokni Chief Minister-na ku·pattianiko on·angaha.
