SWGH-o register ka·gija aro COVID porikka ra·gija napbae dongna man·jawa

TURA: South West Garo Hills a·jaona re·baenggipa manderang register ka·chenggija ba bimingrangko segatchenggija aro COVID-19-na porikkarangko ra·e nichenggija napbae dongna man·jawa ine South West Garo Hills a·jani Deputy Commissioner u·iataha.

Meghalaya a·dokni dingtang dingtang biaprango aro mongsongbate Shillong songjinmaoba COVID-19 ta·raken giproroengahani gimin South West Garo Hills a·jaoba ia sabisini giproroaniko champengsona gita ia niamrangko ra·gataha ine u·iataha.

SWGH a·jani Deputy Commissioner Ch Ramakrishna-ni u·iatani gitade, gipin a·dokrangoni South West Garo Hills a·jaona re·baenggipa manderang, meghalayaonline.gov.in/covid/testing.htm link-o register ka·chengna ba bimingrangko segatchengna nanggen aro uni ja·man Arogya Setu App baksana Behavioural Management App-ko Google Store-oniko download ka·na nanggen. South West Garo Hills a·jaona sokbahaon, Ampati Students’ Field sambani BADO MFC dakenggipao COVID-19-na porikka ra·e nichakengani gimin, ua biapona re·ange an·tangtangko porikka ra·e nina nanggen.

Ia biapo porikka ra·chenggijade darangba songtang noktangona re·angna man·jawa aro songtang noktangchi re·angna skangba songni nokni nokma, sordarrangna u·iate, district administration ba superintendent of police ba block development officer ba district medical & health officer-naba u·iatna nanggen ine Deputy Commissioner u·iataha.

A·palchini re·baenggipa manderang porikkarangko ra·chenggija ba u·iatchenggija songo noko nape donggenchimode dongimin niamrango pangchake sastirangko man·gen ineba South West Garo Hills a·jani Deputy Commissioner mikrakataniko on·angaha.

Iarangni bidingo maiba u·iatna nanganirang donggenchimode, 6009919788/6009945433/6009930091 nombor-rangona ka·e u·iatna man·gen.