SHILLONG: Ja·manchake kobor man·soani gita, mija Sukrobar attamchibarao North Garo Hills-ni Raja A·pal Todam songo mingsinga misilbegipa a·sel ong·anio, wanggipa an·tangni desaron bilsi 17 ong·gipako den·e siataha.
Kobor man·soani gitade, me·chik bi·sani wanggipa, chong·motan ma·gipani segipa kimtaigipa, an·tang namgija dakna cholko ra·na gita miksonge, jikgipako mande siachi re·angchina gita watdraatahachim. Indake jikgipani, mande siachi re·angani somoio, noko darangba dongjamiting tiktako ua (me·chik bi·sani wanggipa) an·tangni degipa Desaronko drae til·ekna jotton ka·aha, aro una skangan baditaba salrangna skangonin desaronko jikgipa dakna jotton ka·ahachim.
Indake ong·engon, dosi dakgipa wanggipa, mija Sukrobaroba desaronko drae til·ekna jotton ka·ahachim, unomitingo wanggipa ba pagipani an·tangko namgija dakna am·aniko jechakani gimin Pagipa an·tangni demechikko misilbee attechi den·e so·otaha.
Desaron-ko so·otani gimin uni kosako Bajengdoba Police Station-o FIR ka·ahachim, indiba me·chikni wanggipa dosi dakgipa Pa Lillam Marak-koba mijal pringo kae siako man·skaaha.
Ja·mano uamang sakgnini manggisikon post mortem ka·na gita ra·angaha.
