TURA: Ma·mong sorkarini on·atenggipa PMAY scheme-ko dilgiparang jakkalsretengani a·sel kangal cholgrirang, pucca nokrangko rikna man·jae da·o gita mikka balwa rakani somoirango neng·nikanirangko chagrongna nangrongenga ine Tura-ni gital MDC Bernard N Marak matnangataha.
Marak-ni parakatani gitade, ia PMAY scheme-ko BJP dolchi dilenggipa ma·mongni NDA sorkari, kangal cholgrirangna dam komiani pucca nokrangko rike on·na gita on·atengachim indiba ia gong lak 1.3-mang ong·gipa scheme-ni tangkarangko dilgiparang, kangal cholgrirangna on·gija, da·o gita mikka balwa ta·rakanichi neng·nikaniko chagrongna nangenggipa nokdangrangna gong 3000 ba gong 5000 ka·e compensation-rangko on·skaengachim.
“Bilsiantian kangal cholgrirangna pucca nokrangko rike on·na on·atenggipa PMAY scheme-ni tangka paisarangko on·jaengani a·sel kangal cholgrirang, kutcha nokrangosa dongna nangtokenga aro da·o gita mikka balwarang rakani somoirango nokrang be·grue neng·nikanirangko chagrongna nangtokenga,” ine BJP-ni state vice president Bernard Marak parakataha.
Tura-oba bilsibrimangna skangan mitam me·chikrang, Tura Municipal Board (TMB) gita ia PMAY scheme-ni nokrangna dorgastorangko galtokahachim indiba da·onan Tura jillao PMAY-ni nok te·sakoba nikna man·kujaenga ineba Marak parakataha.
“Ia scheme-ko man·tokjaengani a·sel manderang kutcha nokrangon dongna nangtokkuenga aro mikka balwarang rakani somoirango nokrang pe·ako man·e neng·nikanirangko chagrongna nangtokenga. Bang·bata dilgiparangan an·tangtangni kamko dongnuna gita iandakmiting somoirango neng·nikanirangko chagrongna nangenggipa nokdangrangna compensation-rangko on·mikskaenga,” ine Tura-ni MDC parakataha.
Marak-ni parakatani gitade, ia PMAY scheme-rangko Tura-ni manderangna ku·rachakani ja·man da·ode ia PMAY scheme-ko uamang jako ra·jaenga ine TMB, RTI ka·gipana aganchakaniko on·skaahachim.
“PMAY-ko ku·rachakenba, manderangko house holding tax aro gipin grorangko gamataha. Ia scheme-ni bidingo anga chu·gimikkon tale sandigen aro sorkarini ra·gate on·enggipa pilak scheme-rangan manderangona sokchina gita chinga BJP dolni gita, NDA sorkarini ra·gatenggipa scheme-rangko name nirokanggen,” ine Marak parakataha.