TURA: Adita salrangna skang, North Garo Hills a·jani Rari jolo donggipa NGO-rangni membor sakbri, tin kentarangko salangenggipa truck bolsaoniko tangka gildraaha ine kobor on·aha.
Ia mande sakbrioni saksade jolo donggipa skulni skigipa ong·achim aro uamangko police-rang rim·na sandion uamang biaptangtangoni kate dongenga ine kobor on·aha.
Kobor on·timgiparangni u·iatani gitade, ia a·sel ong·ani re·anggipa April 23 tarik attamni 7:30 bajimango ong·aha aro ia a·selni bidingo Dadenggre-ni Jakra N Sangma minggipa mande saksa, police-rangna FIR ka·doangaha.
Ua somoio tin kentarangko salgipa truck gari, Dadenggre-oni Guwahati-chipakna re·angengachim aro ia gariko ia manderang, Gokol aro Rari-ni gisepgriko champengsoenba, NGO dolprakna gong 1000 ka·e on·china dabiahachim. Gariko saltimgipa Rakiful Islam aro handyman Ariful Islam, uamango tangkarang dongja ine aganon, ia manderang uamang sakgniko kragija dake dokaha ine u·iataha.
Ia a·sel ong·ani ja·mano gari nokgipa, police-rangna ku·sikchi u·iataha aro ja·mano FIR-koba ka·doangaha.
FIR ka·ani ja·mano police-rang ia mande sakbriko rim·na re·angon, uamang biaptangtangoni katsoaha ine kobor on·aha.
Iani a·selni bidingo police-rang nambate am·sandienga aro kate dongenggipa mande sakbriko rim·na jotton ka·enga ine North Garo Hills a·jani police officer-rang parakataha.
