SHILLONG: Meghalaya a·doko COVID-19-na porikka ra·e positive ong·gipa manderangoni bang·a manderangan kate dongna jotton ka·enga aro ia manderangko department-ni gita sandie man·jaengani a·selo kenchakna nangani ong·enga ine kobor on·aha.
Koborko on·ani gitade, re·anggipa April-ni 24 tarikmangmangon East Khasi Hills a·jao sak 166-mangni gita COVID positive ong·ahachim aro ia manderangoni bang·batan gipin biaprangoni re·bapilgiparang ong·genchimoba, ua salo positive ong·giparangoni sak 25 ba sak 26-mangde an·tangtangni phone nombor-rangko tol·e on·tokaha aro da·o ia manderangko health official-rang sandioba man·kujaenga.
Unsalo positive ong·gipa manderangna official-rang phone ka·pile nion, uamangoni bang·bata nombor-rangan switch off, not reachable aro mitamrangde wrong nombor-sa ong·tokahachim ine official-rang u·iataha.
Official-rangni aganani gitade, ia manderangko uamang kobor ra·pile nina jotton ka·enga indiba uamangko man·tokjaengaha.
Ia manderangoni bang·batan porikka ra·e nianio positive ong·ani ja·mansa kate dongtokenga aro uamangni bidingo department-ni official-rang maming kobor dongkujaengani gimin ian namen kenna nangani ong·enga ineba official-rang parakataha.
Meghalaya a·dokona aro mongsongbate East Khasi Hills a·jaona napbaenggipa manderangko Umling entry point-rangon porikka ra·e nisoenga aro iandakgipa obostarang ia entry point-rangon ong·enga ineba official-rang u·iataha.
Indake ong·engon, gipin biaprangoni re·baenggipa manderang an·tangtangni phone nombor-rangko tol·e on·na man·jana gita entry point-rango dingtang dolko donna nanga aro ua somoion a·paloni re·baenggipa manderangna phone ka·e nina nanga ine official-rang aganaha.