TURA: Sixth Schedule-ko taridapkujaskalde Garo Hills Autonomous District Council (GHADC)-ni election-rango Tribal ong·gijagipa manderangni bak ra·paaniko darangba champengna man·jawa ine adita salrangna skang Phulbari-ni NPP MLA SG Esmatur Mominin-ni songbadrango parakataniko New Tura Development Forum (NTDF) dolba raken jegalataha.
Phulbari MLA-ni agangipa kattarangko jegalatengon, Tribal-rangni bilko chel·chakna on·gimin Autonomous District Council (ADC)-rangna Indian Constitution-ni Sixth Schedule-o tarigimin niamrangko ua tale ma·sie ra·ahama ine NTDF sing·doangaha aro mai dakgipa niamrango pangchake Tribal ong·gijagipa manderang, ADC election-rango bakko ra·pana man·enga, uarangkoba talate on·china dabiangaha.
A·jao bilsi 12-na songdongkamgipa manderangde dilgiparangko seokanio bakko ra·pana bil man·aiaha ine Phulbari MLA-ni agangipa kattarangko jegalatengon, Sixth Schedule-ni badia bako bilsi 12-na a·jao songdonggimin manderangde dilgiparangko seokanio bakko ra·na man·a ine sea donga aro bilsi 12-na songdong a·chaaniara maikai GHADC election-o bak nangeani donga ine NTDF sing·doangaha.
“Badiaba dolrangsa GHADC election-na skang iani bidingo politics kal·ahachim ine Phulbari-ni MLA aganaha indiba chinga NTDF-ni gita una talataniko on·na ska, chinga iani bidingo maming politics kal·na miksongani ba jatsa jatgipinni kosako chakatna miksongani dongja indiba Tribal-rangna on·gimin bilko chel·chakna ADC-rango niamrangko name ja·rikanikosa nangnika,” ine NTDF-ni general secretary LC Momin parakataha.
Tribal-rangna gisik sanagipa kattarangko aganna skang MLA, niamrangko name poraichengna aro sandichengna nanga ineba NTDF parakataha.
KHADC aro JHADC election-rangode gipin jatrang susapana ba dilgipako seokanio bakko ra·pana man·jani gimin ia apsan niamkon GHADC-oba ja·rikna nanga ineba NTDF dabiangaha.
“Apsan a·dokni apsan ADC-rangon maikai niamrang dingtangna man·a?” ine NTDF-ni general secretary sing·doangaha.
Pagitchamrangni tarianggipa apsan niamrangkon da·oba autonomous district council (ADC)-rangna jakkalkuengani gimin gipin jatrangni bak ra·aniko champengna gita niamrangko taridapna nangani katta dongjachim ineba NTDF parakataha.
“Badiaba niamrangko dilgiparang taridapaha ong·ode, GHADC-oba Constitution-ni on·gimin niamrangko kakket aro bebeo ja·rikna man·na gita niamrangko taridapanio NTDF bakrimaniko on·na kusi ong·aigen,” ine Momin parakataha.
Mikkangchi GHADC election-rango Tribal ong·gijagipa manderangni bak ra·paaniko champengna man·na gita Phulbari MLA-ni agangipa kattarangko jegalgrimchina gitaba NTDF, Garo Hills-o songdongenggipa manderangko didiangaha aro mikkangchi GHADC election-rango Garo Hills-ni Tribal candidate-rangnasan doltangtangni tikitrangko on·china gita dingtang dingtang political dolrangkoba didiangaha.
