James-ko power-oniko ra·galna dabiaoni UDP an·piljawa

SHILLONG: James Sangmako power portfolio-oniko ra·galchina dabigipaoni UDP mamingdakeba an·piljawa ine UDP chief adviser, Bindo Mathew Lanong Sombaro aganaha.
Chinga chingni dabiaoni mamingdakeba an·pilani dongja, James-ko power portfolio-oniko neng·takatna nanga ine Lanong aganaha.
Ong·rongbewal obostaoba portfolio-rangko jujaatrongaia, indake da·oni obostarangko nigrikatomangba power portfolio-ko gipin Cabinet Minister-na on·na ga·akenga, UDP dilgipa aganaha.
‘‘Chinga uko Cabinet-oniko ra·galchina dabijaenga, indiba power portfolio-kosan uoniko ra·jitatchina gita dabienga,’’ UDP chief adviser aganaha.
Uni aganani gitade, haida saoba gipin minister power portfolio-ko jako ra·genchimode power department-o neng·nikanirangko namatnaba dongachim.
MeECL-o da·o chagrongenggipa neng·nikanirangko niaton, unbaksana matnanggrikanirangko nikon, MeECL-o maiba dal·bea ong·gija dakanirang dongtelnan nanga ineba ua aganaha.
‘‘Bang·a matnanganirangan jinmani mikkangona ong·katpilaha. Unigimin MeECL-o ong·enggipa ia obostarangko Sorkari sandiatna nanga,’’manderang kakketko ma·sina ska Lanong aganaha