WILLIAMNAGAR: East Garo Hills a·jaoba Coronavirus (COVID-19)-ko warachakangkuna gita night curfew-ko wal 10:00 bajioni pring 5:00 bajiona ra·gattaiaha ine East Garo Hills a·jani Deputy Commissioner u·iataha.
East Garo Hills a·jao night curfew-ko walni 10:00 bajioni pring 5:00 bajiona ra·gatahani gimin curfew-ni somoirango manderangni nok compound-rangona agrede gipin biaprang jekai bazar anti, rama sorok, kal·chakram ba uandakgipa biaprango mande sakbonga ba una bate tom·chimongna man·jawa ine East Garo Hills a·jani District Magistrate Swapnil Tembe u·iataha.
Deputy Commissioner-ni u·iatani gitade, Williamnagar Municipal area aro Rongjeng Bazar-o donggipa dokkanrangko attamni 7:00 bajion chiptokna nanggnok.
Olakkiram nokrangko kuliani bidingo janapatengon, olakkiram nokrango bak 10-oni bak 5-na bate manderang tom·na man·jawa aro minute 45-na bate olakkianirangko dakna man·jawa ine DC u·iataha.
Tom·anirangko ong·atengon tom·anio sak 30-na bate manderang tom·chimongna man·jawa aro tom·anirangko ong·atna skangba Deputy Commissioner-oniko permission ra·chengna nanggen ine u·iataha.
Kam nangchongmotana nokoni ong·katengon, mask-rangko ganchina, ku·sikrangko katipchina aro saksa sakgipinoni chel·grike dongchina gitaba DC u·iataha.
Night curfew-ni somoio police-rang, fire & emergency service, medical, MeECL, PHE, PWD, Press aro uandake nangchongmotgipa kamrangko ka·enggipa dolrangkode champengani dongjawa ineba DC u·iataha.
