SHILLONG: Meghalaya a·doko lekka porako nambatatna gita sorkari, NCTE-ni nangchongmotgipa poraiani gadang baksana MTET pass ka·gimin sak 1320 LP aro UP skulni skigiparangko ia jani gisepo rakkidapaha ine Bristibar salo a·dokni Chief Minister Conrad K Sangma parakataha.
Chief Minister-ni parakatani gitade, skigiparangna kamrangko sualmanahani gimin skigipa saksanchi chalaienggipa skulrangba a·doko dongjawaha.
Indake ong·engon, skigiparangko seokna gita batanggimin bilsirangonin kamrangko ka·soengaha aro mikkang antioba adita skigiparangko kamo rakkidapkugen ine a·dokni Education Minister Lahkmen Rymbui-ba parakatskaaha.
Contract basis-o rakkigipa sorkari LP skulrango bang·en skigipani kamrang bangbang ong·e dongkuenga ine talatangengon, kamrangko namdapatna gita ia skulrango skikamnagiparangko seokna nangenga ine Rymbui aganaha.
“Meghalaya a·doko lekka porako tang·doatna gita sorkari, je skulrangon chatro chatrirang komie, sak 5 ba sak 6 skigiparang dongachim, uandakgipa skulni skigiparangko, chatro chatrirang bang·e skigiparangko nangdapenggipa skulrango donatskagen,” ine Rymbui parakataha.
A·doko lekka porako tang·doatna gita sorkari, skia man·gipa skigiparangko, skul nokrangko aro syllabus-rangko ra·doatna kam ka·enga ine parakatengon, dingtang dingtang skulrangko songni dilgiparang an·tangtangan nirok sandichina aro seokako man·gipa skigipani kamrangko nirokchina Education Minister didiataha.
Skigiparang skulrangchi re·jaenga ong·ode skigipani kosako ja·kuko de·na man·na gita songni dilgiparangan, official-rangna u·iatna nanga ineba Education Minister didiataha.
“Kamna seokako man·gipa skigiparang, je biapoba donatako man·china kamtango bimchipe class-rangko ra·jringchina,” ine Education Minister aganaha.
Skigipa saksanchi chalaienggipa skulrang a·doko bang·en dongkuenga ine janapatengon, iandakgipa skulrango sorkari komibeoba skigipa sakgniko donatgen ine Education Minister parakataha.
Ia bilsini MTET porikkana July jaon form-rangko gapatna nanggen aro porikkako ia bilsini August jaon ong·atnaba gnang ineba Education Minister parakataha.