SHILLONG: Tikarangko chu·onga gita man·kujaengani gimin bilsi 18-oni bilsi 45 ong·gipa manderangko COVID-19 tika su·na gita adita somoirangko nangkuainaba gnang.
Bilsi 18 batgiparangko May 1 tarikoni tika su·na sorkari manchisoahachim ine nikna man·a.
Indake ong·engon, Health department-ni Principal Secretary Sampath Kumar-ni u·iatani gitade, tikarangko su·na gita bilsi 18 batgimin manderang, online gita bimingtangtangko segatchengna nanggen aro iana registration window-ko sorkari, Budbar saloni a·bachengataha.
Tikarangko Meghalaya sorkari, Serum Institute of India-oniko bi·atmanaha indiba samrang a·dokona sokbana gita komibeoba jasarangde nangkunaba gnang ineba Kumar parakataha.
“Samrang a·dokona sokbaahaon chinga bilsi 18 batgiparangko tika su·na a·bachengatgnok,” ine Health official parakataha.
Meghalaya a·dok gimikon da·o COVID-ni tikarangko su·chichaengaha aro iana sorkari name tarisomanaha ineba ua parakataha.
COVID-19-ko warachakanio tikako su·e ra·anian namen nangchongmotgipa ong·enga ine janapatengon, da·o dipet sorkari, bilsi 45 badegimin manderangko tikarangko su·chengenga ine Kumar parakataha.
Health official-rangni u·iatani gitade, Meghalaya a·doko da·ororo salantian pong 10,000 tikarangko su·enga aro ia tikarangko health worker-rangoniba bang·en su·e ra·na man·aha.
Ia bilsini August aro September jani gisepon a·dok sorkari, a·doko songdongenggipa mande sakantinan komibeoba COVID-ni skanggipa tikakode on·na miksongenga ineba kobor on·aha.