U·IATTIMGIPAONI
TURA: Garo Hills Autonomous District Council (GHADC)-o kam ka·giparang an·tangtangni dormaharangko man·tokkujaengani gimin kamrangko ka·gija jingjengatengani a·sel kajinarangko gile man·ronggipa krorni kror tangkarangko gimaatna nangengani gimin GHADC-o kajinarangko man·na gitade, skango gitan kamrangko name ka·piltaina nangengaha ine GHADC-ni Secretary Rikse R Marak parakataha.
GHADC-o kam ka·giparangna dormaharangko on·jaengani gimin aro GHADC-o tangka paisani gita neng·nikanirangko man·na nangengani gimin dingtang dingtang dolrangni matnanganirangna aganchakaniko on·angengon, GHADC-o kam ka·giparang ta·raken kamrangko ka·piljagenchimode mikkangchi GHADC-ko chalaina bate neng·nikanirangko chagrongna nanggnok ine Bristibar salo, GHADC-ni Secretary aro a·dokni civil service officer Rikse Marak, kobor ra·timgiparangna parakataha.
“Chingni dal·batsranggipa ra·biani aro neng·nikanian kajinarangko chimongna man·gijanian ong·enga. Kajinarangko gilna gita batanggimin jagni chingna namen nangchongmotgipa ong·achim indiba GHADC-ko chipe donanichi chinga tangka paisarangko chimongna man·jaha,” ine Marak parakataha.
GHADC-o kam ka·giparangna indita jarangni dormaharangko on·na nangengoba tangka paisarang dongjani a·selan neng·nikanirangko chagrongna nangenga ineba GHADC-ni Secretary talatangaha.
“Jagittamni kajinarangko chimongesa chinga kam ka·giparangna jasani dormahakon on·na man·enga aro iani a·selan kam ka·giparangna grorang batroroangaha. Kajinarangko chimonganio chinga gong kror 2-mangsan man·enga indiba gitcham dormahako hisapon kam ka·giparangna japrako gong kror 4-mang ong·skaenga,” ine Marak parakataha.
Ia jani gisepo kajinarangko chimonganio man·gnirang dongjaha ine talataniko on·angengon, skangode GHADC-o kam ka·giparangna, sorkari aro gipin private dolrangoniko professional tax gile man·gipaonikosa jasani dormahako on·na man·achim indiba ia changode professional tax-onikoba maming man·gnirang dongsrangjaha ine Secretary parakataha.
GHADC-ko tangka paisani gita bilakatpiltaina kamrangko a·bachengatengaha aro kamrangko matchotahaode council-o tangka paisani gita bilakgnok ineba Marak parakataha.
GHADC-ko tangka paisani gita bilakatpiltaina a·bachengatenggipa kamrangni gimin janapatengon, “GHADC-ni pilak department-rangkon digital aro computerised ong·atahaode kamrangko aro koros ong·anirangko altuaen see rakkina man·gnok aro Garo Hills-ni chel·a biaprango donggipa manderang, an·tangtangni gamchatgipa tangka paisa aro somoirangko bon·ate Tura-ona re·bana nanggija an·tangtangni council tax-rangko gamna man·na gita chinga bank-rang baksaba link-ko tariengaha,” ine GHADC-ni Secretary parakataha.
“GHADC-o kam ka·giparangni dormaharangko on·na gita chinga rake kamko ka·enga aro iani bidingo chinga proposal-koba sorkarina on·manaha. Chinga ka·donga ia kamo sorkari chingna dakchakaniko on·gen,” ine Marak, GHADC-o kam ka·giparangko kamtangtangona re·bapile kam ka·piltaichina didiataha.