May 1 tarikoni Tura-o garirang skatang re·rurana man·jawa

U·IATTIMGIPAONI

TURA: Garo Hills-oba COVID-19-ni giproroenganiko champengna gita West Garo Hills a·jao aro mongsongbate Tura jillao niamrangko rakbatatahani gimin May 1 tarikoni May 10 tarik pring 5:00 bajiona kingking garirangba skatang re·rurana man·jawa ine West Garo Hills a·jani Deputy Commissioner Ram Singh u·iataha.

May 1 tarikoni May 10 tarik pring 5 bajini gisepo saoba a·ja damgipinona ba a·dok damgipinona re·rurana nangchongmotenga ong·ode “Apply for e-Car Pass” ine seenba http://westgarohills.gov.in aro http://westgarohills.gov.in/covid-19html website-rango e-Pass-na dorgastoko galna man·gen ine DC u·iataha. Dorgastoko ra·chakahaon, dorgasto galenggipa mandeni phone-ona SMS sokanggen aro e-Pass-ko on·gen. Ia kosako on·gimin District website-onikon dorgastoko sandie, e-Pass-ko download ka·e ra·na man·gen ineba u·iataha.

Tura aro Rongram jolrango nangchongmota kamrangna re·rurana nangenggipa manderangnade pass dongjawa indiba an·tangtangni nanganiko see aro COVID-ni niamrangko ja·rike re·rurana man·gen ine Deputy Commissioner u·iataha. Re·rurana gita an·tangtangni kam nanganiko see ong·katengoba, uarang tol·gipasa ine ma·sigenchimode ua mandeni kosako dongimin niamrango pangchake sastiko on·gen ine DC mikrakataha.

Indake ong·engon, manderangko salruraenggipa bus, sumo, taxi, auto, maxicab ba uandakgipa garirangde May 1 tarikoni a·bachenge, odd aro even nombor gita salsa watchanggrike garirangko salrurana man·gen ine West Garo Hills a·jani District Transport Officer (DTO) u·iatskaaha. DTO-ni u·iatani gitade, Sombar, Budbar aro Sukrobar salrango, 1,3,5,7 aro 9 nombor-rangchi bon·gipa garirang salrurana man·gen aro Mongolbar, Bristibar aro Sonibar salrangode, 0,2,4,6 aro 8 nombor-rangchi bon·gipa garirang salruraskana man·gen.

Indake ong·genchimoba, bostu salruraenggipa garirangkode maming champengani dongjawa indiba bostu salgipa garirango manderangko gatna man·skajawa ine Deputy Commissioner u·iataha.