TURA: West Garo Hills a·jani Phulbari jolo sak 11 manderangko COVID-19-na porikka ra·anio positive ong·ani ja·man Phulbari bazar-ko chipe donchina gita West Garo Hills a·jani Deputy Commissioner Ram Singh, ge·etaniko on·ataha.
Koborko on·ani gitade, Sonibar salo Phulbari jolo donggipa manderangko porikka ra·e nianio sak 11 manderang positive ong·aha aro uandaken Phulbari bazar-o manderangni re·ruraanirangko champengna gita ia jolko containment zone dakataha.
Apsan daken, South West Garo Hills a·jani Ampati-o donggipa St Claret Father’s Compound-oba pamong saksa COVID-19-ko man·ahani gimin SWGH a·jani district administration, ia biapko chipe donataha ine kobor on·aha.
Indake ong·engon, South West Garo Hills a·jani Salmanpara primary health centre (PHC)-oba mande saksako porikka ra·anio positive ong·ahani gimin PHC-ko samrangchi rongtalatna aro ia mandeko gronggipa aro sangipa manderangko porikka ra·e nina gita ia PHC-ni out patient department (OPD)-ko Sonibar aro Robibar salgnina chipe donataha ine kobor on·aha.
