SHILLONG: Meghalaya Board of School Education (MBOSE)-ni Secondary School Leaving Certficate (SSLC) porikka da·al Sombar salo matchotgnok.
Ia bon·kamgipa salo, SSLC porikkako seenggipa chatro chatrirang, Mathematics subject-ko segen.
Iani bidingo MBOSE-ni official-rango sing·sandiaton, SSLC-ni bon·kamgipa porikkako tom·tome aro name matchotatna gita official-rang, pilak nanga kamrangko ka·somanaha ine Robibar salo, MBOSE-ni official-rang parakataha.
Meghalaya a·dokni dingtang dingtang examination centre-rango ia SSLC porikkako ra·anio da·o dipet maming neng·nikanirangko chagrongna nangjaha ineba official parakataha.
MBOSE official-ni parakatani gitade, Higher Secondary School Leaving Certificate (HSSLC) porikkani mongsonggipa subject-rangkoba ra·manaha aro da·o mathematics-ko man·chape adita subject-rangsan bangki dongkuenga.
SSLC aro HSSLC porikkarangko badita sak chatro chatrirang sekuna nangenga ine sing·on, dingtang dingtang a·jani examination centre-rango sena sienggipa chatro chatrirangni bidingo kobor man·soahaosa badita sak porikkako seenga ukode ma·sina man·gen ine MBOSE official parakataha.
“Porikkako ong·attaianio senagipa chatro chatrirangde bang·jawaha gita nikenga indiba da·o chinga chu·gimikkode aganna man·kujaenga,” ine MBOSE-ni official aganaha.
SSLC aro HSSLC porikkarangko seenggipa chatro chatrirangoni COVID-19 man·gipani bidingo da·o dipet kobor man·soa dongkuja ineba ua parakataha.
May 1 tarikonin 10 tarikona Shillong, Tura aro Jowa-ode manderangni aro garirangni skatang re·ruraaniko champengatengani gimin porikka seenggipa chatro chatrirangkode an·tangtangni admit card-rangkon pass gita jakkalchina sorkari u·iatahachim.
Comments are closed.