EKH-o bilsi 45 badegiminrangoni tika su·giparang komienga

SHILLONG: East Khasi Hills a·jao bilsi 45 badegimin manderangoni COVID-19-ni tikako su·giparang komienga ine East Khasi Hills a·jani Deputy Commissioner Isawanda Laloo, suk ong·gijaniko parakataha.
East Khasi Hills a·jao bilsi 45 badegimin manderangoni COVID-ni tikako su·na gisiko nangjaenga gimin an·tangni suk ong·gijaniko parakatengon, “Bilsi 45 badegimin mande sakantikon maming kennani gri tikarangko su·e ra·china didiatenga. Bilsi 45 badegimin manderang, an·tangtangni sepangbatgipa centre-rangona re·ange tikarangko su·e ra·ena man·gen aro uamang CoWIN App ba cowin.gov.in website-o skang register ka·chenge, an·tangtangna watatgipa SMS-ko ba screenshot-ko mesokna man·gen. Ia salrango manderangni re·ruraaniko champengengoba tika su·na re·ongkatenggiparangkode watenga,” ine Laloo parakataha.
Mande sianirango jinma tom·bimonganirangchian COVID-19-ko giproroatenga ine talatangengon, sigimin manderangko gopani ba so·anirango ja·rikna nanggipa gital niamrangkoba Laloo jinmana parakatjolaha.
“COVID-19 man·gipa manderangba mande sianirangona re·ange sabisiko gipinrangona gipatenga ine koborrangko man·soaha,” ine East Khasi Hills a·jani DC parakataha.
Mande sianirango jinma tom·anirangchi sabisirang giprorojana gita sak 30-na bate jinma tom·na on·jaengaha ineba DC parakataha. Mande sianirango bakko ra·engon, saksa sakgipinoni metre 2 ba feet 6 chel·grike dongchina aro saksa sakgipinko salam ka·grikjachina gitaba Laloo u·iataha. Mande siaona re·anggiparang sanitiser-rangko on·china aro ia sanitiser-rangko jakkaljringchina u·iatengon, mande sianirango jinmana mirangko on·jachina gita DC mikrakataha.