SHILLONG: Re·baenggipa 2022 bilsi March jani gisepon Meghalaya a·doko ra·gate ka·enggipa PMGSY-ni kilometre 1800 ramako matchotatna gita a·dok sorkari tik ka·angaha.
Iani bidingo Mongolbar salo dingtangmancha tom·aniko ong·atangenba, a·dokni Chief Minister Conrad K Sangma an·tangan a·doko ra·gate ka·enggipa PMGSY ramarangko nipilangaha aro kamrangko 2022 bilsini March jani gisepon matchotatatna gita nisanko donangaha.
Kamrangko district aro block level-o nirokjringenba somoi gita matchotatchinaba ua dingtang dingtang a·jani deputy commissioner-rangko aro officer-rangko ge·etangaha.
Chief Minister-ni parakatani gitade, re·anggipa bilsioba km 800-ko matchotatna nisanko done, Meghalaya a·doko PMGSY-ni km 728.25 ramarangko matchote dongimin nisanni 98 percent-mangkode matchotna man·ahachim.
Re·anggipa bilsioba COVID-19 giproroani a·sel a·doko neng·nikanirangko chagrongna nangahaoba kamrangko namen matchotatna man·aha ine janapatengon, ia changoba donsoenggipa nisanko chu·sokatna man·na gita kamrangko rakbate ka·angkuchina gita a·dokni Chief Minister, officer-rangko didiangaha.
2013 bilsioni matchotgija dongenggipa kamrangko matchotatchina gitaba ia tom·anio a·dokni Chief Minister, officer-rangko didiangaha.
