TURA: Garo Hills-oba aro mongsongbate West Garo Hills a·jao COVID-19-ko man·giparang ta·raken batrorobaengani gimin West Garo Hills a·jao Sonibar aro Robibar salgnina chu·gimik lockdown-ko ra·gatengaha ine West Garo Hills a·jani Deputy Commissioner Ram Singh u·iataha.
Chu·gimik lockdown-ko Sonibar aro Robibar salgnina ra·gatengon, ia salgnini gisepo nangchongmotgipa dokkanrangna agrede gipin dokkanrang kulina man·jawa aro kam nangchongmotgipa manderangna agrede darangba re·rurana man·jawa ine Deputy Commissioner u·iataha.
Deputy Commissioner-ni u·iatani gitade, night curfew-koba da·o salantian attam 8:00 bajioni pring 5:00 bajiona ra·gatangskagnok aro ia somoirango nangchongmotgipa manderangna agrede darangba ramarango re·rurana man·jawaha.
Dokkanrangko kulina dongimin somoirangni bidingo talataniko on·angengon, manderangni nangchongmota ong·gijagipa bosturangko palenggipa dokkanrang da·o Sombar, Budbar aro Sukrobar salrangosan pring 8:00 bajioni sal 12:00 bajiona kulina man·aignok indiba manderang dokkan ning·chi nape koros ka·na man·jawa aro dokkan nokgiparangan, niamrangko name ja·rikna nanggen ine DC u·iataha. Sorkarini dongimin niamrangko dokkanrango ja·rikjagenchimode dokkanrangko chipatna draatako man·gen ineba Deputy Commissioner mikrakataniko on·angaha.
DC-ni u·iatani gitade, sorkari office-rangba da·o pring 10:00 bajioni attam 4:00 bajionasa kamko ka·na man·aignok.
Nokoni ong·katengon mask-rangko ganna nangchongmota aro mande jinmani biaprango, jekai dokkan, office ba uandakgipa biaprango ta·makkurangko ringna aro sturamramna man·jawa ineba DC mikrakataha.