EKH-o rang·gitik lockdown-ko ra·gatatanina Mahila Cong, a·dok sorkariko sing·doa

SHILLONG: Salantio hajira ka·e cha·enggiparangna aro gipin cholgri manderangna tarisamsoani cholrangko on·chenggija East Khasi Hills a·jao Budbar attam dipet rang·gitik lockdown-ko ra·gatangahani gimin Mahila Pradesh Congress Committee, NPP-chi dilenggipa MDA sorkarini kamko sing·doangaha.
Iani bidingo kobor setimgiparangna seachi parakatengon, lockdown-ko ra·gatna skang a·dok sorkari, opposition dolni dilgiparang baksaba agangrikchengjaha aro ian sorkarini manderangna simsakgijaniko aro kam choligijaniko mesokani ong·aha ine Mahila Congress Committee-ni state president Joplyn S Shylla parakataha.
Lockdown-ko ra·gatna skang a·dok sorkari, Mukul Sangma, HM Shangpliang, George Lyngdoh, Marylborn Syiem, Ampareen Lyngdoh aro opposition-ni gipin membor-rang baksa agangrikchengna nangachim ineba Shylla matnangataha.
“Sal somoiko on·chenggija lockdown-ko rang·gitik ra·gatanichi manderang mai dakgipa neng·nikanirangko chagrongna nanggen, uarangko nichenggija sorkarini ja·ku de·aniara namen ra·chakna man·gijani ong·aha aro lockdown-ko ra·gatna skang sorkari, opposition dolni dilgiparangko okame agangrikchengna nangachim,” ine Mahila Congress-ni dilgipa parakataha.
East Khasi Hills a·jao lockdown-ko re·anggipa May 5 tarik attamoni May 10 tarik attamona ra·gatangahachim ine nikna man·a.
East Khasi Hills a·jao aro mongsongbate Shillong songjinmani wilwilao manderangni nangchongmotgipa bosturangko dam bate palna cholko ra·tokaha indiba MDA sorkari, iandakgipa kamrangko nirok sandina gisiko nangjaha ineba Mahila Congress matnangataha.
A·dokni CHC aro PHC-rango COVID-ko warachakna tarianirangko a·dokni health minister niangahama ineba Mahila Congress-ni state president sing·doangaha.