Jengjal-o cryogenic oxygen plant kulinagipa biap aro Tura-ni hospital-rangko CM nianga

TURA: Bristibar salo Meghalaya a·dokni Chief Minister Conrad K Sangma, West Garo Hills a·jao ong·enggipa obostarangko nina re·baani somoio Jengjal-ni Baljek jolo kulina sienggipa cryogenic oxygen plant-na donenggipa biap aro Chasingre-o kulina sienggipa jabol galchakani biaprangko niangjolaha.
Skanggipa ua Jengjal-ni Baljek jolona re·ange cryogenic oxygen plant kulina sienggipa biapko niangchengaha aro ia oxygen plant-ko kulina gita Sukrobar salonin kamrangko a·bachengatgnok ine parakangaha.
“Ia biapo oxygen plant-ko kulianichi Garo Hills-ni dambonga a·jarangna aro West Khasi Hills a·janaba oxygen-rangko on·na man·gnok. Ian mongsonggipa biap ong·ani gimin ia biapo oxygen plant-ko kulianiara pilaknan namgni ong·gen aro chinga kamrangko Sukrobar salonin a·bachenggnok,” ine Bristibar salo Chief Minister parakataha.
Tura-ona re·baengmiting somoio a·dokni Chief Minister, Chasingre-o donggipa Inter State Bus Terminus (ISBT)-oba nappake, hospital-rango galenggipa jabolrangko galchakna gita tarina sienggipa bio-medical waste incinerator-ko niangjolaha.
Chief Minister-ni u·iatani gitade, ia project-na gong kror 4 tangkarangko chame donaha aro kamko jagnini gisepon matchotatani ong·enga.
“Ia sal somoirango COVID man·giparangko sannanio aro porikkarangko ra·anio jakkalgipa ma·manti jabolrangko galchakna biapko nangengani gimin ia biapo jabol galchakaniko tarigen aro chinga ka·donga ia biapo bakan kamrangko a·bachengatgnok,” ine Chief Minister parakataha.
Tura-ona sokbaani ja·man a·dokni Chief Minister, Tura-ni Maternity & Child Hospital, Tura Civil Hospital aro SMELC-o donggipa Corona care centre-koba niangaha aro iani ja·mano sorkari official-rang baksa Tura-ni circuit house-o tom·e West Garo Hills a·jao ong·enggipa obostarangni gimin chanchirimangaha.
“Chinga West Garo Hills aro Tura constituency-ni high level Covid committee baksa tom·e COVID-ko warachakna tarisamsoanirangko niangaha. Official-rangni tarisamsoanirangko chinga chu·ongnikaha indiba simsakbate kam ka·aniko chinga nangnikenga,” ine tom·a matchotani ja·mano Chief Minister aganaha.
Ia sal somoirango ta·rakbate COVID giproroengani gimin sakantikon simsake dongchina aro Health department-ni dongimin niamrangko ja·rikchina gitaba Sangma didiangaha.