NGH-ni biap dam 3-o dokkanrangko kulina somoirangko suale on·a

TURA: North Garo Hills a·jao COVID-19-ni giproroaniko champengna gita Dainadubi, Kharkutta aro A·dokgre bazar-rango manderangni skatang koros ka·aniko chel·chakna gita dingtang dingtang dokkanrangna North Garo Hills a·jani Deputy Commissioner, somoirangko sualataha.
North Garo Hills a·jani Deputy Commissioner RP Marak-ni u·iatani gitade, Sukrobar sal dipet Dainadubi, Kharkutta aro A·dokgre bazar-rango donggipa galamal, hardware, hotel ba cha dokkanrang, kni ratgipa dokkanrang, gue keli dokkanrang, bite aro me·surangko palgipa dokkanrang, be·en aro na·tokrangko palgipa dokkanrang pring 8:00 bajoni salni 1:00 bajiona kulina man·gen aro ba·ra dokkan, electrical, furniture, electronic, cycle dokkan, nongani bosturangko palgipa dokkan, kal·susaani bosturangko palgipa dokkan, mobile dokkan aro tyre tarigipa dokkanrang attam 1:00 bajioni attam 6:30 bajiona kuliskana man·gen.
Dokkanrango dongtimgiparang aro breenggiparang pilakan mask-rangko ganna nanggen ine u·iatengon, dokkan ge·antion hand sanitiser ba sabon baksana chiko donna nanggen aro saksa sakgipinoni chel·tanggrike donganiko ja·rikna nanggen ine North Garo Hills a·jani Deputy Commissioner u·iataha.
Ia niamrangko ja·rikjagenchimode dairangko gamna nanggen aro dokkanrangko chipatna draatako man·gen ineba DC mikrakataniko on·angaha.