SHILLONG: A·doko giproroenggipa COVID-19 sabisiko dakgrikchakna gita A·dok Sorkari kror 400-500 ong·pile koros ka·omangba COVID-ni obostarangko jako ra·na gita cholnikjaenga ine Opposition MLA Mohendro Rapsang aganaha.
Bristibaro koborni manderangna aganengon, COVID sabisiko dakgrikchakna gita sorkari tarie donga ine A·dok Sorkari da·sikkarionin aganenga indiba da·oni obostarangko niatora, Sorkari iana maming tarisoa dongja ine ma·sina man·a inenba West Shillong-ni MLA Mohendro Rapsang aganaha.
“A·dokni District ge·saba ia obostarangna tarie dongsogipa dongja. Shillong-ni hospital-rango bakan sagiparang gapengaha. Maia ong·nasienga? Kror 400-500 tangkarangko koros ka·eba mamingkon tarisojaode,” Rapsang sing·doaha.
A·dok Sorkari da·sikkario COVID-19 sabisiko dakgrikchakna kam ka·anio kror 399 tangkarangko koros ka·aha ine Sorkarini a·kange agangipani gimin Rapsang, ia kattarangko aganaha.
Indake ong·engon, ia sorkarini a·kange agangipa kattarangko civil society-rang ra·chakna man·ha, aro unoni intalan Sorkari, COVID sabisiko dakgrikchakna kam ka·anio koros ong·anirangko jinmana paraktaijahachim.
Kror 400-500 tangkarangchide ge·sa dal·gipa COVID-19 hospitalkon rikna man·pilgnokchim ineba Rapsang aganaha.
Unomitingo East Khasi Hills district-o Sorkarini rang·gitik lockdown ra·gatatani gimin ua suk ong·gijaniko parakaha. Tarie dongsona gita manderangna on·tisa somoikode on·chengna nangachim ine Congress MLA aganaha.
