SHILLONG: A·doko COVID-19 sabisichi sinjetako man·a skangonin, Meghalyao tourism industry tang·dona man·kujaenga, indake da·o gnigipa changna COVID sabisichi su·pekako man·on Tourism ba songre songbatani a·bao namen namjabatsrangaha, indake tourism-o pangchake janggi tanggiparangna da·o namen neng·nikani sokaha.
Unaskangoba, a·doko law and order ba niam ainrangni obostarang tom·tomjani a·sel a·dokni tourism neng·nikaniko man·engachim, indiba da·o COVID sabisi sokbataie namjabatatsrangaha.
A·dokni bang·bata tourist spot-rangan chiptokna nangao ga·akaha, ia tourist spot-rango basako songre songbatbagipa manderangko niksotaigen, u·isona man·ja.
Tourist spot-rangsan ong·aigija, sabisi sajinmani a·sel, a·dokni pilak hotel aro guest hous-rangba bang bang dongtokenga, jeni a·selan nokgiparangna namen gimaani ong·enga.
A·doko gnigipa changna COVID sabisichi sinjetako man·na skangde tourist-rang bang·bataiengjokchim, indiba da·ode dongtaijaha ine Federation of Shillong Hotels-ni President Parambir Singh aganaha.
COVID sabisi bang·baroroani gimin A·dok sorkari, pilak tourist-rangkon Meghalayaona napbana gita re·anggipa jaon champengatahachim ine nikatna man·a.
