Kamrangko ka·gija jingjengatangkuna NGEA tik ka·a

TURA: Salgittamni gisepo kamtangtangko ka·epiljagenchimode kamrangko bon·atna man·aigen ine Garo Hills Autonomous District Council (GHADC)-o kam ka·enggiparangko gital executive committee (EC) ka·mikkenataniko on·ahaoba, kam ka·giparangni man·na nangkuenggipa dormaharangko on·ani bidingo ku·rachakaniko on·jaskalde, je ong·genchimoba kamrangko ka·gija jingjengatangkuaigen ine Non-Gazetted Employees Association (NGEA)-ni dilgiparang parakatskaaha.
Adita salrangna skangsan, NGEA-ni dilgiparang, gital Executive Committee-ko grongtaienba, kam ka·giparangni man·na nangkuenggipa dormaharangni bidingo aro GHADC-ni secretary ong·enggipa Rikse R Marak-ko kam ra·galchina dabienggipani bidingo agangrikangtaiahachim indiba GHADC-ni chief executive membor aro gital EC-ni membor-rang, NGEA-ni dabienggiparangko chu·sokatani bidingo maming ka·dongatani ba ku·rachakanirangko on·na man·jahani gimin GHADC-o kam ka·giparang, mikkangchiba kamrangko ka·gija jingjengatangkuna tik ka·angahachim.
“NPP-chi chalaigipa gitcham executive committee-ba chingko apsan daken kamrangko bon·atna ka·mikkenatahachim aro da·o gital executive committee-koba NPP-an dilengani gimin chingko apsan daken ka·mikkenatenga. Chingni nangnikaniara chingni man·na nangkuenggipa dormaharangko on·ani bidingo chingna ku·rachakanikosan nangaiachim indiba ia gital EC, chingna ia ku·rachakanimangmangkoba on·na man·jaengani gimin chinga a·bachengo manchigimin gitan chingni jingjengataniko dontongkujawa,” ine NGEA-ni joint secretary Flaming B Marak parakataha.
A·doko sorkariko chalaienggipa dolsa GHADC-na tangka paisani gita dakchakanirangkode on·na man·aigen ine election-ni somoio NPP dolko seokchina Chief Minister Conrad K Sangma-ni agangipa kattarangko gisik ra·atangengon, “Meghalaya a·doko MDA sorkariko NPP dolan dilenga aro da·o GHADC-oba apsan dolan EC-ko rikaha indide maini gimin GHADC-o kam ka·enggiparangni man·na nangkuenggipa dormaharangko on·na gita Chief Minister dakchakna man·jaenga?” ine NGEA sing·doataha.