SHILLONG: Meghalaya a·dokona Serum Institute of India-oni pong 42,630 COVID tikarang sokbaahaon bilsi 40-oni bilsi 44 ong·gipa manderangko tika su·chengna Health department manchiaha.
“Pong 42,630 tikarang sokbaahaon bilsi 40-oni bilsi 44 ong·gipa manderangko tika su·e ra·chenggen. Da·o dipet chinga bang·gija tikarangkosan man·sona siengani gimin chinga bilsi brebatgiparangko su·chengna miksongenga,” ine Health department-ni official saksa parakataha.
Tikarangko pongprako gong 300 ka·e Serum Institute-oniko breataha aro ia tikarang mikkang antiode sokbanaba dongaha ineba official parakataha.
“Sorkari hospital-rango chinga bilsi 40-oni bilsi 44 ong·giparangna tikarangko indin on·gen indiba private hospital-rangode tika su·na tangkako gamna nanggen,” ine Health official parakataha.
Private hospital-rango tikarangko su·na damko tik ka·ahama ine sing·on, tikarang sokbaahaosa damrangkoba tik ka·gen ine official parakataha.
Meghalaya a·doko bilsi 18-oni bilsi 44 ong·gipa sak lak 15 manderangna komibeoba pong lak 30 tikarangko nanggen aro iana sorkari gong kror 90 baksana GST-ko gamna nanggen ine adita salrangna skangsan a·dokni Chief Minister Conrad K Sangma parakatahachim.
“Pong lak 30 tikarangko brena gita chingo tangka paisarang dongjae neng·nikanirangkode man·enga indiba tikarangko su·na nangchongmotskaenga,” ine Chief Minister aganahachim.
