Sorkari da·al COVID-ni obostarangko nipilanggen

SHILLONG: A·doko giproroenggipa COVID sabisini obostarangko A·dok Sorkari Sonibaro nipilaniko dakenba a·doko da·omitingo ra·gatenggipa containment measures champengatgipani bidingo chanchirimanggen, unomitingo Shillong songjinmao songgiparangoni bang·an, bang·a bang·ja bading chiwalanirangkode Sorkariko kulina on·aniko nangniktokenga.
Dolsa kobor ra·timgiparang Sukrobaro, Shillong songgipa adita manderangko sing·e nion, a·doko sabisi batroroengani gimin bang·an lockdown ong·ataniko nangnike niktokaha indiba mitam niamrangko sorkarini on·tisa olgrokatanikoba uamang nangniktokaha.
Lockdown ra·gatanio bading chiwale cha·giparangna neng·nikani ong·bataha, maina pala simanirangko dakna gita man·jawa dokkan nokni pararangkode uamang gamna gita nangaiachim.
Unomitingo mitam dokkandarrangde bosturangko nokrangona paljojoenba uamangni janggi tanganina cholrangko dakskaenga.
Songjinmao dokkanrangko chipatani da·o antignimang ong·nasipilengoba, da·o dipet sorkarioni, neng·nikanio ga·akgipa manderangna dakchakaniko on·ani giminde maming koborran dongkujaenga ine nikatna man·a.