Lockdown-ni somoio name nirokanirang dongjani a·sel bang·batan niamrangko manitokja

SHILLONG: Meghalaya a·doko COVID-19-ko man·giparang batroroengani gimin lockdown-ko ra·gatengon, bang·bata biaprangon name nirok sandianirang dongjani a·selan manderang niamrangko manitokjaenga aro uandaken East Khasi Hills a·jaode May 17 tarikona kingking lockdown-ko ra·gatdapangtaiaha.
Gipin a·jarangoba, Sonibar aro Robibar salgnina lockdown-ko ra·gatangahachim indiba bang·bata biaprangon nirok sandigiparang dongjani a·sel manderang skatang ong·katna man·tokaiaha ine kobor on·aha.
Garo Hills-oba badiaba badiaba biaprangona agrede bilake nirok sandianirangko nikna man·jahani a·sel gari gorarangni aro manderangni re·ruraanirangko aditade nikna man·aiahachim.
Koborko on·ani gitade, East Khasi Hills a·jao re·anggipa May 7 tarik attamonin lockdown-ko ra·gatahaoba Shillong songjinmani mongsonggipa biaprang, jekai Jhalupara, Mawbah, Laitumkhrah, Nongmensong aro uandakgipa biaprangode salgimikan garirangni aro manderangni re·ruraanirangko nikna man·engachim.
Shillong songjinmani Jhalupara aro Mawbah jolrangode, attamantian bite dokkanrangni kulianirangko nikna man·rongenga aro attamo manderangni re·rurae roanirangko nikna man·enga ine kobor on·timgiparang parakataha.
Indake ong·engon, gittimtangtango manderangni skatang re·ruraanirangko aro niam pe·anirangko nambate nirok sandina man·na gita sorkari, gittim aro songko dilenggipa manderangna bilko on·na nanga ine a·dokni gitcham home minister RG Lyngdoh, ku·pattianiko on·ataha.
Lockdown-ni somoio COVID ong·gija gipin saanirangko man·enggipa manderangna sanna bananiko on·na gita sorkari cholko ra·gatna nanga ineba Lyngdoh aganaha.
“Shillong-ni hospital-rango kamrangko olgrokatna gita sorkari, stadium ba sports complex-rango dingtang COVID camp-rangko songe sanna bananirangko on·skana man·gen,” ine Lyngdoh aganaha.
Lockdown-ni somoirango manderang skatang re·rurana aro korosrangko ka·na man·jana gita rakbate nirok sandianirangko dakchina gitaba ua didiangaha.
“Manderangni koros ka·anirangko nigenchimode maiba manianirang donga gitasa nikpilenga aro bang·bata manderangan kenna gri skatang daktokenga,” ine Lyngdoh aganaha.
Garo Hills-oba salgnina lockdown-ko ra·gatanganio badiaba badiaba biaprangode niam pe·giparangko rim·e sasti on·anirangko nikna man·aha indiba mitam biaprangode nirok sandianirang dongjani a·sel gari gorarangni aro manderangni skatang re·ruraanirangko nikna man·skaaiahachim.