TURA: 15th Finance Commission-ni ning·o Garo Hills Autonomous District Council (GHADC)-na ma·mong sorkarini chamatgipa gong kror 36.40 tangkarangko dingtang kamna jakkalskaaha ine Tura-ni BJP MDC Bernard N Marak matnange, ia tangkarangko jakkalani bidingo talataniko on·china GHADC-ni gital executive committee-ko dabiangahani gimin ia tangka paisarangko jakkalsreta dongkuja aro ia tangkarang da·o dipet a·dok sorkarion ong·kuenga ine a·dokni Finance department talataniko on·angaha.
15th Finance Commission-ni ning·o ma·mong sorkari, Meghalaya a·dokni damgittam autonomous district council-rangna gimik gong kror 91 tangkarangko chamatahachim indiba GHADC-na chamatgipa gong kror 36.40 tangkarangko, GHADC-ko chipe Administrative Rule ong·engmiting somoio gipin kamrangnasa jakkalskaaha ine adita salrangna skang Tura-ni BJP MDC Bernard Marak matnangenba, ia tangka paisarangko jakkalani bidingo talataniko on·china GHADC-ni chief executive membor-o dabiangahachim.
Indake ong·engon, 15th Finance Commission-ni ning·o GHADC-na chamatgipa tangkarangko gipin kamrangna jakkalsreta dongkuja aro da·o dipet ia tangkarang a·dok sorkarion ong·kue tangkarangko on·atna gita kamrangko ka·engaha ine Meghalaya sorkarini ning·o donggipa Finance department-ni Secretary aganchakaniko on·atskaaha.
“15th Finance Commission-ni ning·o GHADC-na chamatgipa tangkarangko jakkalsretaha ine songbadrango seaniara kakket ong·ja maina ia tangkarang da·o dipet a·dok sorkarion ong·kuenga aro tangkarangko on·atna gita kamrangko ka·engaha,” ine Finance department-ni Secretary parakataha.