TURA: Gipin biaprangoni re·bapilenggipa manderang, North Garo Hills a·jani Berubari aro Dainadubi entry point-rangko gele re·bana jotton ka·enga ine koborko man·soahani gimin songtangtango aro joltangtango gipin biaprangoni re·bapilgipa manderangko sandie COVID-19-na porikka ra·china aro noktangtango dingtang nape dongna didichina gita North Garo Hills a·jani ning·o donggipa dingtang dingtang songni nokma, sordar, VEC-ni dilgiparang aro mondolini dilgiparangko, Deputy Commissioner didiataha.
Deputy Commissioner-ni u·iatani gitade, gipin biaprangoni re·bapilenggipa mitam manderang, Berubari aro Dainadubi entry point-rangko gele songtangtangona re·bana jotton ka·enga aro an·tangtangni re·baani bidingo joltangtangni PHC, CHC aro sub-centre-rangna kobor on·jaenga ine koborko man·soahani gimin iandakgipa manderangko sandie, an·tangtangko porikka ra·e nina gita joltangtangni ASHA ba uandakgipa health worker-rangna u·iatskachina songni nokma aro gipin dilgiparangko didiataha.
“North Garo Hills a·jao gnigipa changna COVID-19-ni giproroaniko champengna aro warachakna ja·kuko de·anio na·simang sakantini bakrimaniko nangenga,” ine North Garo Hills a·jani Deputy Commissioner RP Marak parakataha.
