TURA: South West Garo Hills a·jani Betasing PHC-o COVID-19-ko man·giparang dongahani gimin Betasing C&RD Block-ni ning·o donggipa Marpara songgimikkon ‘Containment Zone’ dakatna gita nangaha ine South West Garo Hills a·jani Deputy Commissioner Ch Ramakrishna parakataha.
Ia Marpara songko ‘containment zone’ ine parakmanahani gimin da·o dipet gipin biaprangoni darangba ia gittimona re·angna man·jawa aro Marpara ning·o donggipa manderangba ia biaponi ong·katna man·jawa ine South West Garo Hills a·jani Deputy Commissioner parakataha.
“Betasing block-ni Marpara songko ‘containment zone’ ine ra·enga dipetde gipin biaprangoni darangba ia biapona re·bana man·jawa aro ia biap ning·o donggipa manderangba noktangtangoni ong·katgija dongna nanggen. Da·omiting somoio ia biapo jinma tom·anirangko aro program-rangko ong·atna man·jawa aro ia biapo donggipa pilak dokkanrangkoba chipe donkuna nanggen,” ine DC parakatenba, ia biapo donggipa manderangna nangchongmotgipa bosturangko district administration-ni songe on·gipa dolrang, sokate on·skagen ine talatangaha.
Deputy Commissioner-ni parakatani gitade, Marpara songko ‘containment zone’ ine chanengmiting somoio contact tracing-ko dake porikkarangko ra·e nianggen.
