SHILLONG: Meghalaya a·dokoba ta·raken COVID-19 batrikrikengani gimin lockdown-ko ra·gatengon, an·o donggipa me·chikrangkode iandakgipa obostao kamrangko ka·atjachina gita Hynniewtrep Integrated Territorial Organisation (HITO), a·dokni Deputy Chief Minister Prestone Tynsong-na sedoataha.
Deputy Chief Minister-na sedoatgipa chittio HITO-ni parakatani gitade, da·o gnigipa changna COVID-19 giprorotaiengon, an·o donggipa me·chikrangba kamrangko ka·tokna nangenga aro ian an·o donggipa me·chikrangna aro uamangni bi·sarangna namen kenchakna nangani ong·enga.
Kamtangtangko ka·engmiting somoio an·o donggipa me·chikrang COVID man·genchimode, a·dok sorkarian daiko jako ra·na gita nanggen aro pilak nanga korosrangko gamna nanggen ine HITO parakataha.
“Chingni ma·siani gitade, re·anggipa 2020 bilsio skanggipa changna COVID-19 giproroani somoiode an·o donggipa pilak me·chikrangkon kamoniko watahachim indiba da·o gnigipa changode an·o donggipa me·chikrangkoba kam ka·atenga,” ine HITO-ni dilgiparang suk ong·gijaniko parakatenba, iandakgipa obostani somoio an·o donggipa pilak me·chikrangkon kamoniko watchina sorkariko didiataha.
