TURA: Meghalaya a·dok gimikon ta·rakbee COVID-19 giproroengahani gimin sabisini giproroaniko champengna gita Garo Hills-ni dambonga a·jarangoba Sonibar aro Robibar salgnina chu·gimik lockdown-ko ra·gatangtaiaha.
Sonibar aro Robibar salgnina lockdown-ko ra·gatanio manderangni aro gari gorarangni skatang re·ruraaniko champengatangan baksana dokkanrangkoba chu·gimik chipe donchina ge·etaniko on·angtaiaha.
Ia salgnina lockdown-ko ra·gatangengon, bilsi 18-oni bilsi 44 ong·gipa manderang, jemangan COVID-ni tikako su·e ra·na gita internet-o bimingtangtangko segatmanahachim, uamangde an·tangtangni tika su·chakenggipa centre-rangona re·rurana man·aigen indiba uamang ramarango nanggenchimode, an·tangtangni identity card-rang baksana tika su·na register ka·ani message-ko mesokna nanggen ine West Garo Hills a·jani Deputy Commissioner u·iataha.
“West Garo Hills a·jaoba ta·raken COVID-19 batrikrikengahani gimin May-ni 15 aro 16 tarikrango chu·gimik lockdown-ko ra·gattaina nangenga indiba je manderangan COVID application gita tikarangko su·na register ka·manahachim, uamangkode an·tangtangni health centre-rangona re·rurana on·gen. Tikako su·na re·engon, uamang an·tangtangni photo ID card baksana an·tangtangni mobile phone-rango man·sogipa SMS-rangko mesokskana man·na nanggen,” ine West Garo Hills a·jani Deputy Commissioner parakataha.
Bilsi 18-oni bilsi 44 ong·gipa manderangna tika su·aniko Sukrobar sal dipet Tura-oba, Dobasipara Urban Health Centre, Matchakolgre Urban Health Centre aro Holy Cross Hospital-o a·bachengahachim.
