TURA: Sukrobar salo gimik sak 55 manderang West Garo Hills a·jao COVID-19-ko man·dapaha ine kobor on·aha.
West Garo Hills a·jani Deputy Commissioner Ram Singh-ni u·iatani gitade, Sukrobar salsani gisepon West Garo Hills a·ja gimiko sak 55 manderang, COVID-19 positive ong·dapaha aro uandaken da·o West Garo Hills a·jao COVID-19 man·e dongenggiparang gimik sak 392 gapengaha.
Sukrobar salo Tura Civil Hospital, Holy Cross Hospital, Nepali Mandap, Jail Road-o donggipa Darenbibra aro Proper Hawakhana-koba man·chape dingtang dingtang biaprango COVID positive ong·giparang dongaha.