TURA: West Garo Hills a·jani Raksamgre Civil Sub-Division-ni ning·o donggipa Rongsai aro Hatogaon songrangona Assam a·dokoni niam gri napdrabae nokrangko rikengani a·sel ia jolrango so·sojengjeng ong·anirangko nikna man·rongenga ine Garoland State Movement Committee (GSMC) Pedaldoba regional unit parakatenba, ia neng·nikanirangko ta·raken namatchina gita Garo Hills Autonomous District Council (GHADC)-ni deputy Chief Executive Membor Nikman Ch Marak-na sedoataha.
GSMC Pedaldoba regional unit-ni chairman Rimjen Ch Sangma-ni parakatani gitade, re·anggipa bilsion iani bidingo magisterial inquiry-ko dakmanahachim indiba da·onan Assam aro Garo Hills-ni gisepo simako songkujaengani a·sel Assam-oni manderang niam gri napdrabae ia jolrango songdong a·chatokkuengachim.
“Iandake Assam-oni niam gri napdrabae Meghalaya a·dok ning·o nokrangko rikengani a·selan jol damgnini gisepo dinggrikanirang aro so·sojengjeng ong·anirangko nikna man·rongenga aro iani a·selan ia songrango songdongenggipa manderang kenchipchipe janggi tangna nangtokenga,” ine GSMC Pedaldoba unit-ni chairman parakatenba, ia jolo songdongenggipa manderangni namgnina ta·raken iandakgipa neng·nikanirangko namatchina gita GHADC-ni deputy CEM-ko didiataha.
GSMC chairman-ni parakatani gitade, Assam aro Meghalaya a·dokni gisepo Jinjiram chibimasa sima gita ong·engachim indiba Assam a·dokoni manderang ia chibimako re·batbae Meghalaya a·dok ning·on nokrangko rikskaengachim.
“Ia a·arangara GHADC-ni a·arangsa ong·achim aro ia biapo Meghalaya a·dokni Forest Beat House-ba dongachim. Indiba ia Forest Beat House mikkangon niam gri nokko rikskaaha aro ian mikkangchi Meghalaya a·dokna gimagniko mesokani ong·enga,” ineba GSMC Pedaldoba unit-ni chairman parakataha.
