SHILLONG: Lockdown-ni somoio Shillong songjinmao maidakgipa obostarang ong·engachim, uarangko ma·sina gita Meghalaya Governor, Satya Pal Malik Sombaro songjinmani dingtang dingtang biaprangona re·roroe niaha.
Governor Malik, manderang lockdown-ni niamrangko ja·rika ba ja·rikja uarangko ma·sina gita Golflinks, Upper Shillong aro Police Bazaar dakgipa biaprangona re·angenba obostarangko nie nike ra·aha.
Ua jeje biap a·damrangonan re·angahachim, obostarangko uni nie nike ma·sibagiminrangko, nigrike kamrangko ka·china gita East Khasi Hills-ni Deputy Commissioner-na parakataha.
District Administration-ni ja·ku de·anirangko chu·ongnike aganengon, Shillongni mitam biaprangode chadameberang aro mitam manderang kam gri romikbranggipa dongkuengani gimin lockdown-ni niamrangko ra·batatkuchina gitaba Governor, East Khasi Hills-ni DC-ko ku·pattiataha.
