SHILLONG: Meghalaya a·doko Border Security Force (BSF) sipairangoni 99 percent-de COVID-19-ni skanggipa tikako su·e ra·tokmanaha ine kobor on·aha.
BSF official-rangni u·iatani, BSF Meghalaya Frontier-ni ning·o donggipa BSF sipairangoni 99 percent-de COVID-ni skanggipa tikako su·e ra·manaha aro 87 percent-ni gita COVID-ni gnigipa tikakoba su·e ra·tokmanaha.
“Chinga Meghalaya Frontier-ni gitaba COVID-19-ko warachakna raken kamko ka·enga aro uandaken BSF sipairangoni 99 percent-de skanggipa tikako aro 87 percent-de gnigipa tikakoba su·e ra·tokaha. COVID-19-ni tikarangko su·e ra·ani a·selsa ia sal somoirango BSF sipairangoni COVID man·giparang komiangaha,” ine BSF Meghalaya Frontier parakataha.
BSF official-rangni parakatani gitade, da·ororo dingtang dingtang sipai dolrangoni BSF dolan COVID man·giparangoni komibatgipa dol ong·engahachim aro ia pilakan BSF sipairangna COVID-ni tikarangko on·ani a·selan ong·engachim.
BSF dolni sipairangara, sima ari jolrango nirok sandigipa dol ong·e pangnan an·seng baljoke dongna nanggipa dol ong·achim ineba nikna man·a.
