SHILLONG: East Khasi Hills a·jao salantian COVID-19-ko man·giparang batrorobaengani a·sel obostarang namjabatroroengahani gimin sabisini batrikrikanganiko champengna gita a·dok sorkari, East Khasi Hills a·jao chu·gimik lockdown-ko May 19 tarik attam 8:00 bajioni re·baenggipa May 31 tarik pring 5:00 bajiona ra·dodapattaina tik ka·angaha.
Iani bidingo kobor ra·timgiparangna u·iatengon, Meghalaya a·doko aro mongsongbate East Khasi Hills a·jao COVID-19-ko man·giparang salantian batrorobaengani a·sel kenna nangani ong·engahani gimin sorkari, lockdown-ko May 31 tarikona ra·dodapatna tik ka·angaha ine a·dokni Deputy Chief Minister Prestone Tynsong parakataha.
Deputy Chief Minister-ni parakatani gitade, konta 24-ni gisepon Meghalaya a·doko sak 906 manderang COVID-19-ko man·dapaha aro ia sak 906-oni sak 574-de East Khasi Hills a·jao ong·achim.
“Iandakgipa obostao ong·na nangengahani gimin sorkari, East Khasi Hills a·jao lockdown-ko ra·dodapattaina nangaha,” ine Tynsong parakataha.
Mongolbar salo COVID-19 man·dapgipa sak 906 manderangko channe da·o Meghalaya a·dok gimiko COVID man·e dongenggiparang sak 5,332 gapengaha aro ia sak 5,332-oni sak 3,076-de East Khasi Hills a·jao aro sak 674-de Ri Bhoi a·jao ong·enga ineba Deputy Chief Minister parakataha.
Indake ong·engon, gipin a·jarangoba obostani kri a·jatangtangni deputy commissioner-rang ja·kurangko de·anggen aro a·dok gimikon COVID-19-ko warachakna gita rakgipa niamrangko donanggen ine Deputy Chief Minister parakataha.
Lockdown-ni somoio East Khasi Hills a·jani dingtang dingtang biaprango songdongenggipa nokdangrangna nangchongmotgipa bosturangko sokate on·na deputy commissioner kamko ka·anggen ineba Tynsong parakataha.
Nangchongmotgipa aro gelna man·telgijagipa a·selrangna agreed lockdown-ni somoio darangkoba district-ona napbana aro ong·katangna man·jawa. Indake community level-o corona care centre-rangko rikanio sorkari baksa bakrimchina gitaba Dy CM, sorngni aro gittimni dilgiparangko mol·molaha.
Indake ong·engon, Lockdown-ni somoirangoba Health department-ni donsogimin gita COVID-ni tikarangko su·angkugen ine Deputy Chief Minister parakataha.
