TURA: Garo Hills Autonomous District Council (GHADC)-o kam ka·enggiparangna executive committee-ni on·enggipa jabongani dormaharangko ra·chake kamtangtangko ka·taipilchina Tura-ni MP Agatha K Sangma-ni mol·molaniko Mongolbar salo GHADC-ni Non Gazetted Employees Association (NGEA) jegalataha aro GHADC-o kam ka·enggiparangna, uamangni man·na nangenggipa ja 34-ni dormaharang baksa arrear-rangko on·na man·na gita ma·mong sorkarioniko tangka paisarangko bi·atchina Tura-ni MP-ko didiatskaaha.
Agatha-ni mol·mole seatgipa chittina aganchakaniko on·atengon, GHADC-o kam ka·enggiparang indita jarangni dormaharangko man·jae bank-rangoniko, association-rangoniko aro manderangonikosa tangka paisarangko ra·sroe nokdangrangko chalaiahani gimin da·o uamangni grorang namen tang·doangaha aro jabongani dormahako ra·chakgenchimoba uamang grorangkon matchote chotna man·kujawa ine NGEA-ni president Senora Johny Arengh parakataha.
GHADC-o kam ka·enggiparangna ka·sachakaniko mesokengani gimin Tura-ni MP-ko mittelpilangengon, GHADC-o kam ka·enggiparangni man·na nangkuenggipa ja 34-ni dormaha baksana arrear-rangko matchote on·na man·na gita ma·mong sorkarioniko tangka paisarangko bi·atskachina NGEA-ni president, Tura-ni MP-ko didiataha.
GHADC-o gile man·gipa kajinarangko jakkalsretani bidingo aro 2015 bilsioni 2020 bilsiona ma·mong sorkarini chamatgipa scheme-rangni bidingo ma·mong sorkari baksa agangrike CBI-chi am·sandiatna gita ja·kurangko de·china gitaba NGEA, Tura-ni MP-ko didiataha.
Dormaharangko man·jae janggirangko gimaatna nanggipa nokdangrangko okame, uamangni duk mikchirangko ma·sie ra·na gita uamang baksa agangrikchinaba NGEA, Agatha Sangma-ko didiataha.
GHADC-o kam ka·enggiparang bilsi gittam ong·na sipile dormaharangko man·tokkujaengani gimin a·dok sorkari baksa aro mongsongbate District Council Affairs Minister baksa agangrike ia neng·nikaniko namatchina gitaba NGEA, Tura-ni MP-ko didiataha.